1 Samuel 26
1 有兜人對西弗到基比亞來見掃羅，向佢報告，大衛囥在猶大曠野堘頭个哈基拉山頂。
2 掃羅黏時帶以色列个三千精兵到西弗个曠野尋大衛。
3 佢等在哈基拉山路堘安營。大衛還在曠野，當佢聽到掃羅已經帶領軍隊來到个時，
4 佢派探仔出去打探，知得掃羅斷真到來。
5 大衛黏時起身，尋到掃羅㧯佢个元帥—尼珥个孻仔押尼珥睡目个所在。掃羅睡在兵營肚；佢个軍隊在佢个周圍安營。
6 大衛問赫人亞希米勒㧯洗璐雅个孻仔約押个兄弟亞比篩講：「你等兩儕麼人願意㧯𠊎到掃羅个營肚去？」亞比篩講：「𠊎願意！」
7 該暗晡，大衛㧯亞比篩入去掃羅个營肚，發現掃羅睡在兵營个中央，佢个槍插在頭那塍个地上；押尼珥㧯軍隊圍等佢睡。
8 亞比篩對大衛講：「今暗晡，上帝將你个敵人交在你手中。這下俾𠊎用佢自家个槍刺穿佢，刺一下就做得將佢釘在地上，毋使刺兩下！」
9 總係大衛應講：「你做毋得傷害佢！麼人傷害上主膏油立个王，上主一定會責罰佢。」
10 大衛又講：「𠊎指等永生上主發誓，𠊎知上主會㓾掃羅，可能日仔就到了、自家死掉，抑係死在戰場。
11 上主毋准𠊎傷害佢膏油立个王！𠊎等來拿佢頭那塍个槍㧯水罐仔走！」
12 所以大衛對掃羅个頭那塍拿走佢个槍㧯水罐仔，然後㧯亞比篩離開。無人看到，也無人知發生麼介事，連一個乜無醒過來；佢等全部當好睡，因為上主使佢等毋知醒。
13 大衛過去山壢該片，企在山頂，㧯佢等離盡遠，
14 然後大聲向掃羅个軍隊㧯尼珥个孻仔押尼珥喊講：「押尼珥！你有聽到𠊎喊麼？」押尼珥問：「麼人在該位喊王？」
15 大衛應講：「押尼珥，你敢毋係以色列當中最強壯个勇士？你樣般無好好保護國王—你个主人？頭下有人入到營肚去，愛㓾國王—你个主人！
16 押尼珥！你無盡責任。𠊎指等永生个上主發誓，你等全部該死！因為你等無保護好主人，就係上主所膏油立个王。這下你去看，王頭那塍个槍㧯水罐仔在㖠位？」
17 掃羅認出係大衛个聲音，就問：「大衛，吾孻仔啊！係你麼？」大衛應講：「吾主吾王，係𠊎！」
18 然後又講：「主人啊，你做麼介追你个僕人？𠊎做毋著麼介？犯麼介罪？
19 吾主吾王，請聽僕人講。若係上主使你做𠊎个對敵，𠊎願獻祭給佢，好改變佢个心意；若係出在人个陰謀，願上帝咒詛佢等。因為佢等將𠊎逐出上主賜給佢子民个土地，愛使𠊎流浪國外，拜該位个神明。
20 求你毋好俾𠊎死在外國个土地上，遠離上主。以色列个王做麼介愛出來捉𠊎，像捉一隻跳蚤？做麼介愛射𠊎，像射一隻鷓鴣呢？」
21 掃羅講：「𠊎毋著了！𠊎个孻仔大衛，轉來啊！𠊎毋會再傷害你，因為你今暗晡留𠊎个性命。𠊎係糊塗人；斷真盡差！」
22 大衛講：「國王，這係你个槍！請吩咐你一個部下過來拿。
23 上主會照逐儕个信實㧯正義來獎賞佢。今晡日上主將你交在𠊎手中，總係𠊎無傷害上主所膏油立个王。
24 今晡日𠊎保留你个性命，願上主也恁樣保留𠊎个性命，救𠊎脫離所有个災難。」
25 掃羅應講：「𠊎个孻仔大衛啊，願上帝賜福給你！你定著會做大事，也一定會得勝！」所以大衛離開該位；掃羅就轉屋下去了。